माझे राजकारण संपविण्याचा डाव,बेईमानी करणे माझ्या रक्तात नाही पंकजा मुंडे यांनी केली आपली भूमिका स्पष्ट

क्लिक2आष्टी अपडेट-सन 2019 मध्ये मी भाजपची उमेदवार होते,त्या निवडणुकीत माझा पराभव झाला. मात्र,त्या नंतर अनेक वेळा मला संधी दिली गेली नाही. अशा बातम्या झाल्या.मात्र, मला स्वत:ला सिद्ध करण्याची आवश्यकता नाही.अनेकांनी मला ऑफर दिल्याच्या बातम्या आल्या, त्याकडेही मी गांभीर्याने पाहिले नाही.असे म्हणत माझे राजकीय करिअर संपवण्याचा डाव आखला जात असल्याचा आरोप भाजप नेत्या पंकजा मुंडे यांनी केला.पाठित खंजीर खुपसण्याचे माझ्या रक्तात नसल्याची भूमिका पंकजा मुंडे यांनी मांडली.
भारतीय जनता पक्षाच्या नेत्या पंकजा मुंडे या भाजपमध्ये नाराज असून त्या लवकरच पक्षांतर करतील, अशा चर्चा रंगल्या होत्या. या संदर्भात राज्यात नव्याने दाखल झालेल्या बीआरएस पक्षाने त्यांना थेट मुख्यमंत्री पदाची ऑफर दिली होती.तर पंकजा मुंडे काँग्रेसमध्ये आल्या तर आम्हाला आनंदच होईल, असे मत काँग्रेस प्रदेशाध्यक्ष नाना पटोले यांनी व्यक्त केले होते. तसेच काँग्रेस नेते विजय वडेट्टीवर यांनी देखील काँग्रेस पक्ष पंकजा मुंडे यांचे स्वागत करण्यास इच्छुक असल्याचे म्हटले होते.या पार्श्वभूमीवर पंकजा मुंडे काय भूमिका घेणार याकडे सर्वांचेच लक्ष लागले होते.